2019 йил 16ноябрь куни “Бюджет ҳисоби ва ғазначилик иши” кафедраси “Кафедра ҳафталиги” доирасида институт тасарруфидаги 1-талабалар турар жойида “Менинг овозим-бу менинг келажагим” мавзусида давра суҳбатини ташкил этди. Суҳбат давомида 2019 йил 22 декабрда бўлиб ўтадиган Олий Мажлис Қонунчилик палатаси, халқ депутатлари вилоят, туман ва шаҳар кенгашларига сайловлар кунида барча сайловчилар қатори талабалар ҳам фаол иштирок этишлари, бу жараёнга бефарқ бўлмаган ҳолда, ҳар бир ўзбек фуқароси ўзининг конституцион бурчини дилдан адо этиши зарурлигини талабаларга тушинтирдилар. Тадбир якунида кафедра профессор-ўқитувчилари кўп сонли талабаларнинг истаклари асосида олиб келинган буюк иқтисодчи олим Адам Смитнинг “Кўринмас қўл назарияси” китобини ТТЖ кутубхона фондига тақдим этдилар.  

 

 2019-2020 ўқув йилининг ўқув режасига асосан “Ҳаёт суғуртаси” фани доирасида “Суғурта ва пенсия иши” кафедраси ўқитувчилари У.Максудова ва Ф.Ҳамраевалар “Кафолат суғурта компанияси” АЖда “Солиқлар ва суғурта” факультетининг учинчи босқич СС-70 гуруҳи талабалари билан биргаликда сайёр дарс ташкил этдилар.    Ташриф давомида талабалар “Ўзбекистон Республикаси Президенти томонидан 2019 йил 2 августда қабул қилинган ПҚ-4412-сонли “Ўзбекистон Республикасининг суғурта бозорини ислоҳ қилиш ва унинг жадал ривожланишини таъминлаш чора-тадбирлари тўғрисида”ги Қарор ҳамда Ўзбекистон Республикаси Президентининг 2019 йил 13 августдаги “Хусусий мулкни ҳимоя қилиш ва мулкдорлар ҳуқуқларининг кафолатларини кучайтириш, тадбиркорлик субъектларининг молиявий ресурслар ва ишлаб чиқариш инфратузилмасидан фойдаланиш имкониятларини кенгайтириш тўғрисида”ги ПФ-5780-сонли Фармони ижроси юзасидан ўтказилган матбуот анжуманига гувоҳ бўлдилар.    Кафолат суғурта компанияси фаолияти ва суғурта бозорининг бугунги ҳолати ҳамда компаниянинг суғурта бозоридаги ўрни ва мавқеи ҳақида компаниянинг бошқарув раиси Саидолим Насретдинов анжуман қатнашчиларига тушунтириш берди.    

 Институт Ректорати ва Касаба уюшма қўмитаси билан ҳамкорликда Ўзбекистон Республикаси Президентининг 2018 йил 7 февралдаги “Ички туризмни жадал ривожлантиришни таъминлаш чора-тадбирлари тўғрисида”ги ПҚ-3514-сонли қарори асосида 2019 йилнинг 15-17 ноябрь кунлари 40 нафар институт профессор-ўқитувчилари ҳамда ишчи-ходимлари учун Бухоро шаҳрига жамоавий саёҳат ташкил этилди.    Саёҳат давомида Қорахонийлар давлатчилгининг Мовароуннаҳрдаги амири Арслон Буғрохон кўрсатмаси билан қад ростлаган, баландлиги 50 метрга яқин бўлган, айлана бўйича эни 9 метр ва 104 та айланмали зинапоя ғиштдан терилган ҳамда ўз замонида минорадан туриб азон айтилиб, аҳоли намозга чақирилган ёки ўзига хос маёқ вазифасини ҳам ўтаган Минораи Калон ёдгорлигига; Қадимда ҳам (1620 йилларда) ҳудди ҳозирдаги каби Бухоро жамоатчилигининг сергавжум марказларидан бири бўлган, майдонда кичик савдо майдончалари, гўзаллик кошоналари, умумий овқатланиш ва дам олиб, хордиқ чиқариш нуқталари, ҳаммомлар қизғин фаолият юритган, даставвал фақатгина бозор майдони ҳисобланган Лаби Ҳовуз мажмуасига; Кўп йиллар муқаддам маҳаллий амалдорларининг расмий идораси бўлган, 16-20 метр баландликдан иборат, минглаб қулларнинг мутлақо қўл меҳнати ёрдамида барпо этилган, умумий майдони 4 гектардан иборат, “Шаҳар ичидаги шаҳар” дея аталган Арк қалъасига ва яна кўплаб Бухоро шаҳрида жойлашган тарихий ёдгорликларни кўришга муваффақ бўлдилар.    Ҳам саёҳат ҳам зиёрат шаклида ташкил этилган мазкур ташаббус институт жамоасининг бирдамлигини янада мустахкамлаш билан бир қаторда бетакрор ва унутилмас хотираларга бой бўлди.